Alisa-ney Aventuras in Divalanda. Alice's Adventures in Wonderland in Lingwa de Planeta 14+

🔖 Lewis Carroll es nam do kalam. Autor-ney reale nam es Charles Lutwidge Dodgson. Ta bin matematika-lektier in talimguan Christ Church, Oxford. Fama-ney rakonta es begin-ney pa dey 4 mes 7 yar 1862, wen ta fai rema-bota-ney safara pa riva Tems in Oxford pa hunta kun kirkayuan Robinson Duckworth e tri yunge gela: Alice Liddell (do shi-yar-ney yash) to docha de sobreyuan de Christ Church, e elay dwa sista, Lorina (do shi-tri yar) e Edith (ot yar). Kom fa-klare fon poema pa beginsa de kitaba, sey tri gela pregi Dodgson om rakonta, e ta, un-nem sin yao, begin rakonti a li den un-ney version de historia. Ye mucho haf-ahfen ansha a li pet wan tra ol texta de kitaba. Kitaba chu pa fin in yar 1865. Sey edita prisenti un-ney tradukta de "Alisa" inu Lingwa de Planeta (o lidepla, kom nu shwo kurtem). Anastasia Lysenko tradukti-te texta, e Dmitry Ivanov tradukti-te maiste versa. Lidepla es un fon shao Internasion-ney Helpike Lingwa (IHL) kel-malgree swa-ney yungitaa (es begin-ney in 2006)-yo hev sertene, obwol ga limiten, sosiale realisa. Se signifi ke pluri jen in farke landas de munda yusi hi it kom komunikitul, maistem pa internet. Shefe idea to preponsa de lidepla es ke optimale jengun-ney IHL gai basi on 10-12 zuy muhim lingwa de nuy planeta-toy-las kel-ney influsa bu sal fadi in futur, tanto ke oni mog previdi al nau. Al konstrukti lingwa segun tal idea, un fon resultas es ke gaurawe parta de lexika gei importi fon bu-Europa-ney lingwas, lo kel mah lidepla aika originale. ---...